Սաուդյան Արաբիան 40 միլիարդ դոլարով կկրճատի նավթային ծախսերը

Սաուդյան Արաբիայի իշխանությունները մտադիր են մինչև 2028 թվականը կրճատել տնտեսության նավթային հատվածի ծախսերը 40 միլիարդ դոլարով՝ կենտրոնանալով վերականգնվող էներգիայի և հանքարդյունաբերության զարգացման վրա: Այս մասին գրել է Bloomberg-ը՝ հղում անելով Goldman Sachs Group ամերիկյան բանկային խմբի տվյալներին:

Նրա տվյալներով՝ Էր Ռիադը նախատեսում է մինչև 2030 թվականը ներդրումների մոտ 73%-ը վերահղել նավթի արդյունահանման հետ չկապված տնտեսական ոլորտներ: Արդյունքում, մինչև ընթացիկ տասնամյակի ավարտ ռազմավարական արդյունաբերության զարգացման համար իշխանությունների կողմից հատկացված մնացած միջոցների միայն մեկ քառորդը կներդրվի նավթարդյունաբերության մեջ: Այսպիսով, թագավորությունը մտադիր է դիվերսիֆիկացնել իր տնտեսությունը՝ առաջնահերթությունը տալով հանքարդյունաբերության, տրանսպորտային արդյունաբերության և լոգիստիկայի զարգացմանն ու թվայնացմանը:

Մարտին Սաուդյան Արաբիայի էկոնոմիկայի և պլանավորման նախարարությունը հայտնել էր, որ երկրի ոչ նավթային հատվածի ներդրումների չափը 2023 թվականին հասել է 50%-ի, ինչը ամենաբարձրն է թագավորության պատմության մեջ: Գերատեսչության տվյալներով՝ իրական արտահայտությամբ ոչ նավթային հատվածի ներդրումը կազմել է 1.7 տրիլիոն սաուդյան ռիալ (մոտ 453.3 միլիարդ դոլար):

Ավելի վաղ Սաուդյան Արաբիայի վիճակագրության գլխավոր վարչությունը հայտնել էր, որ նավթի արտահանումից կախում ունեցող տնտեսությամբ թագավորության ՀՆԱ-ն 2023-ի վերջին նվազել է 0.9%-ով, մինչդեռ մեկ տարի առաջ այդ ցուցանիշի աճը կազմել է 8.7%: Նախորդ տարվա երրորդ եռամսյակում ՀՆԱ-ն նախորդ տարվա նույն ժամանակահատվածի համեմատ նվազել է 4.4%-ով, չորրորդ եռամսյակում՝ 3.7%-ով: Վերջին երկու եռամսյակների ընթացքում ՀՆԱ-ի անկումը հիմնականում պայմանավորված էր նավթի արդյունահանումը կամավոր կրճատելու որոշմամբ: