Ատոմակայանում շարունակվում են վերանորոգման աշխատանքները

Հայկական ատոմային էլեկտրակայանում (ՀԱԷԿ) ընթացքի մեջ են պլանային նախազգուշական վերանորոգման (ՊՆՎ)՝ 2024 թվականի համար նախատեսված աշխատանքները, որոնք տեղի են ունենում սահմանված ժամանակացույցով և կավարտվեն օգոստոս ամսի առաջին 10-օրյակում: Այդ մասին ասվում է ՓԲԸ  հաղորդագրությունում:

«ՊՆՎ-2024-ի շրջանակներում իրականացվելու են կայանի շահագործման անվտանգության բարձրացմանն ուղղված միջոցառումներ, մասնավորապես՝ ռեակտորային կայանքի հիմնական վերանորոգում, 3-րդ տուրբինի և 3-րդ տուրբոգեներատորի հիմնական նորոգում, 4-րդ տուրբինի ընթացիկ և 4-րդ տուրբոգեներատորի միջին նորոգում, ռեակտորի իրանի հիմնական մետաղի և ներիրանային սարքերի վերանորոգում և վերահսկում, վթարային կարգավորիչ, փոխհատուցիչ կասետների (ՎԿՓԿ) շարժաբների առանցքակալների փոխարինում և հետազոտություն, գլխավոր փակիչի կափույրի հիմնանորոգում և զննում՝ Շահագործման ժամկետի կրկնակի երկարացման ծրագրի շրջանակում:

Ընթացող աշխատանքներում ՀԱԷԿ-ի հիմնական արտադրամասերի աշխատակիցներից բացի ներգրավված են նաև «ՀԱՅԱՏՈՄ», «Էներգոնորոգգարանտ», «Վոլտ Ամպեր», «ԻՍ ԷՆԵՐՋԻ», «ՊՐՈԹԵՐՄ», «ՊՐՈՄՄՈՆՏԱԺ» ընկերություններից, ինչպես նաև Ռուսաստանից, Խորվաթիայից, Չեխիայից և Ուկրաինայից ժամանած փորձառու մասնագետներ:

ՊՆՎ-2024-ի ավարտին հաջորդող փորձարկումների և ստուգումների արդյունքում տրված փորձագիտական դրական եզրակացության հիման վրա ՀԱԷԿ-ի 2-րդ էներգաբլոկը կմիանա Հայաստանի միասնական էներգահամակարգին»,- ընդգծվում է հաղորդագրությունում:

Հիշեցնենք, որ ՀԱԷԿ-ում պլանային նախազգուշական վերանորոգման աշխատանքները մեկնարկել են մայիսի 15-ից եւ կտեւեն 95 օր։ ՊՆՎ-ի ժամանակահատվածում պետք է աշխատանքներ իրականացվեն կայանը վառելիքով լիցքավորելու ուղղությամբ և սկսվեն հիմնական սարքավորումների զննումը ՝ ժամկետի կրկնակի երկարաձգման աշխատանքներ իրականացնելու նպատակով: Նախորդ տարվա դեկտեմբերի 14-ին ՀՀ կառավարությունը որոշում կայացրեց հայկական ԱԷԿ-ի երկրորդ էներգաբլոկի շահագործման ժամկետի կրկնակի երկարաձգման (մինչև 2036թ.) ծրագրի իրականացմանն ուղղել 65 մլն դոլար: Ծրագրի իրականացման աշխատանքներով զբաղվում է “Ռուսատոմ Սերվիսը”, որի հետ կնքվել է համապատասխան համաձայնագիր: Նախագծի պատվիրատուն Հայկական ԱԷԿ-ն է, որը պետական միջոցներ կստանա բյուջետային վարկի տեսքով ։ Մինչև 2036 թվականը նախատեսվում է շահագործման հանձնել նոր ատոմային բլոկ, որի հզորությունների վերաբերյալ քննարկումները դեռ շարունակվում են: