«Նոա»-ի հիմնական կազմի երեք ֆուտբոլիստ կմնա ակումբում

Հայաստանի չեմպիոն ու գավաթակիր Երևանի «Նոա»-ի երեք ֆուտբոլիստ կշարունակի ելույթն ակումբում: Այդ մասին հայտնում են ակումբի մամուլի ծառայությունիցէ նշելով, որ երկարաձգվել են Հովհաննես Համբարձումյանի, Արտակ Դաշյանի և Օգնյեն Չանչարևիչի պայմանագրերը:

Արտակ Դաշյանը Հայաստանի չեմպիոնի և գավաթակրի կազմը համալրել է 2024-25 մրցաշրջանի մեկնարկից առաջ։

«Այստեղ բոլորս մտածում ենք նոր հաղթանակներ կերտելու մասին: Շատ ուրախ եմ, որ շարունակելու եմ իմ ֆուտբոլային ճանապարհը «Նոա»-ում», – ասել է Արտակ Դաշյան։

Ֆուտբոլիստը թիմում անցկացրել է 21 խաղ՝ դառնալով 1 գոլի և 4 գոլային փոխանցման հեղինակ։

Օգնյեն Չանչարևիչը թիմի կազմը համալրել է 2023-24 մրցաշրջանի միջնամասում։ Դարպասապահը «Նոա»-ի մարզաշապիկով մասնակցել է 44 հանդիպման՝ 17-ում անառիկ պահելով իր դարպասը։

«Շարունակում ենք գերազանցության ճանապարհը: Ուրախ եմ, որ շարունակելու ենք միասին գրել պատմության նոր էջերը», – նշել է Օգնյեն Չանչարևիչը։

Թիմի ավագ Հովհաննես Համբարձումյանն արդեն 2 ամբողջական մրցաշրջան է անցկացրել թիմի կազմում. նա մասնակցել է 66 խաղի՝ դառնալով 6 գոլի և 9 գոլային փոխանցման հեղինակ։

«Հպարտ եմ, որ շարունակելու եմ կրել «Նոա»-ի մարզաշապիկը: Ամեն ինչ կներդնեմ, որպեսզի հասնենք մեր նպատակներին», – ասել է Հովհաննես Համբարձումյանը։

Մինչ այս «Նոա»-ն հայտարարել էր նաև Գուստավո Սանգարեի և Գուդմունդուր Թորարինսոնի հետ պայմանագրերի երկարաձգման մասին։