ԱՄՆ կիրառած առևտրային սահմանափակումները վտանգավոր են համաշխարհային տնտեսության համար․ ԱՄՀ

Այլ երկրների նկատմամբ Միացյալ Նահանգների իշխող վարչակազմի կողմից կիրառվող առևտրային սահմանափակումները վտանգներ են ներկայացնում համաշխարհային տնտեսության համար: Այս մասին ասվում է Արժույթի միջազգային հիմնադրամի զեկույցում:

«Առևտրային սահմանափակումների շարունակական ամրապնդումը և ազգային առևտրային շահերին ծառայեցնելու նախապատվությունների ավելացումը օտարերկրյա ընկերությունների դեմ աճող վտանգ է ներկայացնում ինչպես ԱՄՆ-ի, այնպես էլ համաշխարհային տնտեսությունների համար: Միացյալ Նահանգները պետք է ակտիվորեն ներգրավվի իր հիմնական առևտրային գործընկերների հետ՝ լուծելու հիմնական խնդիրները, որոնք կարող են խաթարել համաշխարհային առևտրի և ներդրումային համակարգը»,– նշում են զեկույցի հեղինակները:

Նրանց կարծիքով՝ մաքսատուրքերը և առևտրային խոչընդոտները «ճիշտ լուծում չեն, քանի որ դրանք խեղաթյուրում են առևտրի և ներդրումային հոսքերը և սպառնում են խաթարել բազմակողմ առևտրային համակարգը, մատակարարման համաշխարհային շղթաները և հրահրում են առևտրային գործընկերների պատասխան գործողությունները»:

«Այսպիսի քաղաքականության վարումն, ի վերջո, վնասում է ԱՄՆ-ի տնտեսական աճին, արտադրողականությանը և աշխատաշուկայի կատարողականին: Ապացուցված է, որ դրանց հետևանքները հիմնականում կրում են ԱՄՆ սպառողները և բիզնեսները»,- նշել են ԱՄՀ-ից:

Հիմնադրամի փորձագետները խորհուրդ են տալիս Միացյալ Նահանգներին լիովին մասնակցել Առևտրի համաշխարհային կազմակերպության ամրապնդմանն ուղղված ջանքերին:

Բացի այդ, ինչպես նշվում է զեկույցում, ԱՄՆ-ում գնաճի շուրջ ստեղծված իրավիճակը «կապված է լուրջ ռիսկերի հետ», դրան էլ գումարվում է աշխարհաքաղաքական լարվածության աճը:

Միևնույն ժամանակ, ԱՄՀ-ն վերանայել է ընթացիկ տարվա ԱՄՆ ՀՆԱ-ի աճի իր ապրիլյան կանխատեսումը, որն այժմ գնահատվում է 2.6%՝ նախկին 2.7%-ի փոխարեն, իսկ 2025 թվականի ցուցանիշը մնացել է անփոփոխ՝ 1.9%: