Ադրբեջանի վերահսկողության տակ գտնվող հայկական տարածքների և գերիների հարցերը կլուծվեն․ նախարար

Մենք վստահ ենք, որ այս հարցերը լիովին կլուծվեն սահմանազատման գործընթացի արդյունքում։ Այս մասին օգոստոսի 14-ին լրագրողների հետ զրույցում հայտարարեց Հայաստանի տարածքային կառավարման և ենթակառուցվածքների նախարար Դավիթ Խուդաթյանը՝ պատասխանելով Ադրբեջանից Հայաստանի բռնագրավված տարածքների վերադարձի վերաբերյալ հարցին։

Նրա խոսքով՝ Կիրանցում արդեն իսկ իրականացված սահմանազատման գործընթացը և սահմանազատման տրամաբանությունը, ինչպես նաև նախկինում իրականացված սահմանազատման գործընթացը, վստահություն են ներշնչում, որ այս գործընթացը կշարունակվի, որի արդյունքում խնդիրները կլուծվեն։

Հայկական տարածքների օկուպացիայից ազատագրման և գերիների վերադարձի վերաբերյալ պարզաբանող հարցին ի պատասխան՝ նախարարը կրկին վստահություն հայտնեց, որ սկսված խաղաղության գործընթացի արդյունքում վերը նշված բոլոր խնդիրները կլուծվեն։