Reuters․ Թրամփը կրկին կհետաձգի ԱՄՆ-ում TikTok-ն արգելափակելը

ԱՄՆ նախագահ Դոնալդ Թրամփի վարչակազմը մտադիր է չորրորդ անգամ երկարաձգել այն ժամկետը, որի ընթացքում չինական ByteDance ընկերությունը, որին պատկանում է TikTok սոցիալական ցանցը, կարող է որոշում կայացնել իր ամերիկյան ակտիվները վաճառելու մասին։ Այս մասին հայտնել է Reuters-ը՝ հղում անելով իր աղբյուրներին։

Գործակալության աղբյուրի փոխանցմամբ՝ նոր հետաձգումը քննարկման առարկա կդառնա Իսպանիայում կայանալիք ամերիկա-չինական խորհրդակցությունների ժամանակ։ Միաժամանակ, ինչպես նշում է Reuters-ը, Tiktok-ի ճակատագիրը նախկինում չէր ներառվել երկու երկրների միջև բանակցությունների օրակարգում։

Օրենքը ByteDance-ին պարտավորեցնում է վաճառել կամ փակել TikTok-ը Միացյալ Նահանգներում։ Այն ընդունվել է 2024 թվականին Բայդենի վարչակազմի կողմից: Իր հերթին, Թրամփը հայտարարել է, որ «ջերմորեն» է վերաբերվում հարթակին, քանի որ դրա օգտատերերի ձայները օգնել են իրեն հաղթել նախագահական ընտրություններում: 2025 թվականի հունվարի 20-ին իր երդմնակալությունից հետո նա ստորագրել է գործադիր հրամանագիր, որը հետաձգում է հարթակի արգելափակումը Միացյալ Նահանգներում: Վերջին երկարաձգումը տրվել է հունիսին և լրանում է սեպտեմբերի 17-ին: