Samsung-ի օպերացիոն շահույթը հասել է առավելագույնին

Ընթացիկ տարվա երրորդ եռամսյակում Samsung Electronics-ի օպերացիոն շահույթն ավելացել է 32%-ով՝ համեմատած նախորդ տարվա նույն ժամանակահատվածի հետ՝ հասնելով 12.1 տրիլիոն վոնի (8.48 միլիարդ դոլարի): Այս մասին նշվում է ընկերության նախնական հաշվետվությունում։

Ցուցանիշը կրկնակի գերազանցում է նախորդ եռամսյակի արդյունքը և ամենաբարձրն է՝ 2022 թվականի երկրորդ եռամսյակից ի վեր։

Samsung-ի եռամսյակային եկամուտն աճել է 8.7%-ով՝ հասնելով ռեկորդային 86 տրիլիոն վոնի։

FactSet-ի հարցված վերլուծաբանները միջինում կանխատեսել էին, որ ընկերության օպերացիոն շահույթը երրորդ եռամսյակում կկազմի 9.74 տրիլիոն վոն, իսկ եկամուտը՝ 83.59 տրիլիոն վոն։

Samsung-ի ֆինանսական ցուցանիշների վստահ աճը պայմանավորված է, մասնավորապես, ընկերության կիսահաղորդչային բաղադրիչների արտադրության բաժնի արագ ընդլայնմամբ՝ արհեստական բանականության ոլորտում արձանագրված բումի ֆոնին։

Ընկերության ամբողջական հաշվետվությունը երրորդ եռամսյակի արդյունքներով կհրապարակվի այս ամսվա ընթացքում։